हमासद्वारा प्यालेस्टिनीलाई ट्रम्पको जेरुसेलम घोषणा विरुद्ध आन्दोलन गर्न आह्वान

गाजा/ प्यालेस्टिनीहरूको स्वतन्त्र राज्य माग गर्दै लामो समयदेखि सङ्घर्षरत इश्लामिक हमास आन्दोलन समूहद्वारा अमेरिकी राष्ट्रपति डोनाल्ड ट्रम्पको जेरुसेलमलाई इजरायलको राजधानीका रूपमा मान्यता दिने कदम विरुद्ध व्यापक आन्दोलन गर्न विहीबार आह्वान गरेको छ ।

वेस्ट वैंक, गाजा क्षेत्र र पूर्वी जेरुसेलममा प्यालेस्टिनीहरूले ट्रम्पको अमेरिकी राजदूतावासलाई तेल अभिभबाट जेरुसेलम सार्ने र जेरुसेलमलाई इजरायलको राजधानीको मान्यता दिने कदम विरुद्ध विशाल प्रदर्शन गरीरहेका समय हमासद्वारा ‘इन्तिफादा’ भनिने नयाँ आन्दोलनको घोषणा गरेको छ ।

हमासका नेता इस्माइल हानियले गाजामा एक पत्रकार सम्मेलन गर्दै ‘इन्तिफादा’ को घोषणा गरेका हुन । उनले भने, “आगामी दिन आम विरोधमार्फत जेरुसेलमको स्वतन्त्रतालाई जोगाउनका लागि उत्रिनुपर्ने अवस्थाको सिर्जना भएको छ ।”

इजरायलको विरोधमा यसअघि पहिलो आन्दोलन सन् १९८७ देखि सन् १९९३ सम्म चलेको थियो भने दोस्रो आन्दोलन सन् २००० मा शुरु भएको थियो ।

यसैबीच इजरायली प्रधानमन्त्री बेन्जमिन नेतान्याहुले ट्रम्पको प्रशंसा गर्दै उनी अब जेरुसलेमको इतिहाससँग सधैंका लागि जोडिएको प्रतिक्रिया दिए । नेतान्याहुले अमेरिकी राष्ट्रपतिको बुधबार घोषणा गरिएको कदमलाई “ऐतिहासिक” भनी प्रशंसा गरेका छन ।

तर अमेरिकी राष्ट्रपतिको निर्णयप्रति बेलायत, फ्रान्स, साउदी अरब लगायतका अमेरिकाका पुराना मित्र शक्तिले विरोध गरेका छन् ।

साउदी अरबले अमेरिकी कदमलाई ‘आधारहीन र गैरजिम्मेवार’ भनेको छ भने फ्रान्स र बेलायतले अमेरिकी कदमको समर्थन नगर्ने देखिएको छ ।

प्यालेस्टिनी राष्ट्रपति मोहम्मद अब्बासको फताह पार्टीले ट्रम्पको निर्णयलाई निन्दनीय भन्दै पछिल्लो निर्णयबारे राष्ट्रसंघमा उजुरी दिने बताएको छ ।

यसै विषयमा अरब लिगले शनिबार आपतकालीन बैठकको आयोजना गर्न लागेको छ भने राष्ट्रसंघीय सुरक्षा परिषद्को बैठक शुक्रबार हुने अपेक्षा गरिएको छ ।