दाजुभाइ जब एउटै चितामा जले...

शम्भुनाथ नगरपालिका–२ कनकपट्टीका रामविलास साहका छोराहरु २० वर्षीय सुरेश र १८ वर्षीय शिवकान्त परिवार पाल्न वैदेशिक रोजगारमा जाने योजनामा थिए । तर, विदेश पुग्ने पर्याप्त रकम भएन ।
विदेश जाने रकमको जोहो गर्न उनीहरु काठमाडौं हानिए । उनीहरूले बालाजुस्थित मेलम्ची खानेपानी आयोजनामा काम गर्न थाले । काम सुरु गरेको १० दिन नबित्दै खानेपानीको ढलमा निसासिएर दाजुभाइकै ज्यान गयो ।

विदेश जाने पैसा कमाउन हिँडेका दाजुभाइको शव घर आइपुगेर एउटै चितामा जलाउनुपरेपछि यतिबेला परिवार मात्र होइन, सिंगो गाउँ शोकमग्न छ ।
वैदेशिक रोजगारीमा जान खर्च जुटाउन १० दिनअघि मात्रै उनीहरु बुबासँगै मजदुरीका लागि काठमाडौं गएका थिए ।

आमा र परिवारका सदस्यले छोराले कमाएको रकमको सट्टा मृत शरीर पाए । परिवारका सदस्यले उनीहरुलाई एउटै चितामा राखेर अन्त्येष्टि त गरे तर न अब कमाएर खुवाउने कोही छ, न कसैले क्षतिपूर्ति नै दिए ।
दाजुभाइको एउटै चितामा अन्त्येष्टि गरेपछि शोक मनाउन तथा घटनाको छानबिन र मृतक परिवारलाई क्षतिपूर्ति दिलाउन दबाब दिँदै कनकपट्टी बजार र स्थानीय विद्यालय बन्द गरिएको स्थानीय तेजनारायण चौधरीले बताए ।
बुबा रामविलास र आमा रामबत्तीका दुवै छोराको यसरी ज्यान गएपछि उनको घर नै उजाडिएको छ भने सिंगाे गाउँ नै शोकमा छ । बालाजुमा आयोजनाको ट्यांकी सफा गर्ने क्रममा निसासिएर गत शुक्रबार शिवकान्त र सुरेशको ज्यान गएको थियो ।
‘ट्यांकीको ढलान खोल्न सुरुमा सुरेश पाइपभित्र पसेका थिए, उनी भित्रै ढलेपछि उद्धार गर्न गएका कान्छो छोरा शिवकान्त पनि भित्रै ढले,’ भक्कानिँदै बुबा रामविलासले भने, ‘होहल्ला गरेपछि जम्मा भएका स्थानीय, प्रहरी र डोजरको सहयोगमा उद्धार गरी दुवै छोरालाई महराजगन्ज शिक्षण अस्पताल पुर्‍याउन पनि डाक्टरले बचाउन सकेनन् ।’
उनले सासै फेर्न नसकिने जोखिम पूर्ण ठाउँमा आयोजनाका सुपरभाइजरले छोरालाई जानाजान फसाएर ज्यान लिएको उनको गुनासो छ । उनका बाबुलाई सुपरभाइजरको नाम अमृत हो भन्नेसम्म मात्र थाहा छ ।
बालाजुस्थित सो आयोजनामा रामविलास भने २ महिनादेखि कार्यरत थिए । भाइ भने भर्खर एसईई पास गरेर काठमाडौं गएका थिए ।
रामविलासका दुवै छोरा रोजगारीका लागि विदेश जाने तयारीमा थिए । भिसा नआएकाले तत्काल आवश्यक खर्च जुटाउन केही दिन काठमाडौंमा सँगै काम गर्ने छोराहरुले गरेको आग्रह स्वीकार्दै बुबाले काठमाडौं लगेका थिए ।
शाेकमा आइतबार बिहानैदेखि गाउँभरि चुलो बलेको छैन । राजपाका केन्द्रीय सदस्य दिनेशकुमार यादवले दुःखद घटनाका कारण गाउँमा चुलो नबलेको बताए ।