माया घरलाई युवा विकास केन्द्रले दिने भयो मासिक पाँच हजार रुपैया

इटहरी - इटहरीस्थित माया घरलाई युवा विकास केन्द्रले मासिक पाँच हजार रुपैया दिने भएको छ । सोअनुसार बुधबार पाँच हजार रुपैया संस्थाका अध्यक्ष सञ्जय थारुले संस्थाकी अध्यक्ष तथा संस्थापक राधिका दासीलाई हस्तान्तरण गरे ।

माया घरमा आश्रय लिइरहेका महिला तथा पुरुषहरुको नियमित खर्च व्यवस्थापन गर्न सजिलो होस् भन्नाका लागि सहयोग गरेको थारुले बताए । उनले थप सहयोगका लागि पहल गरिदिनेसमेत आश्वासन दिए ।

इटहरी २ मा रहेको माया घरमा सडकमा बेसहारा भएका, मानसिक समस्या भएका महिला तथा पुरुषलाई ल्याएर राख्ने गरीएको छ । माया घरको भौतिक पूर्वाधार निर्माणाधिन छ । माया घरमा महिला तथा पुरुष गरेर अहिले झण्डै दुई दर्जन मानिस छन् । पुरुषलाई राख्नको लागि स्थान अभाव भएर बाहिर राख्नुपरेको संस्थाकी सचिव सुभद्रा प्याकुरेलले बताइन् ।

उनले सहयोगि दाताहरुको खोजी भइरहेको र प्रदेश तथा स्थानीय सरकारसँग पनि सहयोगका लागि कुराकानी भइरहेको जानकारी दिइन् । माया घरको सहयोगको लागि व्यक्तिगत रुपमा मासिक एक हजार रुपैया अभियान पनि सुरु भएको उपाध्यक्ष राधिका थापाले बताइन् ।