'शरीर बन्धक मुद्दामा महिला पक्राउ'

मोरङको सुनवर्षी नगरपालिका बस्ने एक किशोरी अपहरणमा संलग्न महिलालाई पक्राउ गरी प्रहरीले सार्वजनिक गरेको छ । इलाका प्रहरी कार्यालय रंगेलीले सोमबार पत्रकार सम्मेलन गरेर ती महिलालाई सार्वजनिक गरेको हो ।

उनलाई गत फागुन २ गते राति सुनवर्षी नगरपालिकाकी एक १५ वर्षीया किशोरीलाई राति २ बजे घरबाटै अपहरणमा गरेको आरोप छ । रंगेली प्रहरीमा पीडित परिवारले दिएको जाहेरीको आधारमा साउन दोस्रो सातादेखि प्रहरीले अनुसन्धान जारी राखेको थियो ।

इप्रका रंगेलीका प्रहरी निरीक्षक लेखनाथ प्रसाद दाहालले भने, ‘‘अपहरण तथा शरीर बन्धक र जर्बजस्ती करणी मुद्दा दायर गरी अनुसन्धान थालिएको छ ।’’ प्रतिवदी मध्येका सोही स्थान बस्ने वर्ष ३६ की गीता ऋिषिदेवलाई पक्राउ गरी जिल्ला अदालतबाट म्याद थपिएको दाहालले बताए । उनका अनुसार नौ जना आरोपी मिलेर ती किशोरीलाई ‘भारतको विभिन्न सहरमा लगेर करणी गरेको र तीन सय जनासम्मको लागि रोटी पकाउने काममा राखेको र काम राम्रो नभएपछि शरीरको विभिन्न भागमा तातो पन्यूले डाम्ने काम गरेको’ उजुरी परिवारले प्रहरी समक्ष दिएका छन् ।

पाँच महिनापछि भारतीय प्रहरी र नेपाल प्रहरीको सहयोगमा भारतको पञ्जावबाट ती किशोरीलाई उद्दार गरेर ल्याइएको पत्रकार सम्मेलनमा जानकारी दिइयो । उक्त अभियोगमा अझै नौ जना फरार रहेको र खोजी कार्य भईरहेको रंगेली प्रहरी जनाएको छ ।