सुनसरीको एलाभेन एरोजलाई पाथीभरा गोल्डकप

ताप्लेजुङ । यो पटकको पाथीभरा गोल्डकपको उपाधि एलाभेन एरोज क्लब सुनसरीले जितेको छ ।

झापाको रेडस्टार क्लबलाई टाइब्रेकरमा ४–२ ले पराजित गर्दै सुनसरीले उपाधि जितेको हो । जितसँगै एलाभेन एरोजले नगद ३ लाख ११ हजार १११ रुपैैयाँका साथ २ सय ४० तोला चाँदी र ३ तोला सुन लेपन भएको ट्रफी हात पारेको छ ।

उपविजेता रेडस्टार झापाले ट्रफीसहित नगद १ लाख ५१ हजार १११ रुपैयाँ प्राप्त गर्‍यो ।

खेलको पहिलो हाफ गोलरहित बराबरी खेलेपनि रेडस्टारले ६१ औँ मिनेटमा अग्रता लियो । उसका लागि योगेश गुरुङले गोल गर्दै टिमलाई १–० को स्थितिमा पुर्याएका थिए । खेलको ७५ औं मिनेटमा एलाभेन एरोज सुनसरीका यानिक ओनाले गोल गर्दै टिमलाई बराबरीमा ल्याए ।

४ गोल गरेका उनी सर्वाधिक गोलकर्ताको उपाधिसमेत जित्न सफल भए । खेलको ८७ औं मिनेटमा रेडस्टारका लागि मिलन राईले गोल गर्दै टिमको अग्रता दोब्बर पारे भने एलाभेन एरोजका लागि इञ्जुरी समयको ४ मिनेटमा समन राईले गोल गर्दै टिमलाई बराबरीको स्थितिमा ल्याए ।

टाइब्रेकरमा सुनसरीले झापालाई ४–२ ले हरायो ।