अध्यक्ष दाहालपार्टीभित्रका ‘झगडा’ मिलाउँदै

भदौ ०८, काठमाडौं /
सशस्त्र द्वन्द्वका बेला सरकार र नेकपा माओवादीका अध्यक्ष पुष्पकमल दाहाल ‘प्रचण्ड’लाई शान्ति वार्तामा ल्याई शान्ति सम्झौता गराउन तत्कालीन नेकपा एमालेका महासचिव माधवकुमार नेपालले भूमिका निर्वाह गर्नुभएको थियो। शान्ति प्रक्रिया शुरू भएपछि उत्पन्न जटिल राजनीतिक परस्थितिमा प्रचण्डलाई सहमतिमा ल्याउन नेपालले नै समन्वयकारी भूमिका निर्वाह गर्नुभएको थियो।

त्यतिबेला नेपाल र प्रचण्ड समान हैसियतको जिम्मेवारीमा हुनुहुन्थ्यो। उहाँ तत्कालीन नेकपा एमालेका महासचिव र प्रचण्ड विद्रोही माओवादीको अध्यक्ष हुनुहुन्थ्यो। अहिले परिस्थिति ठ्याक्कै मोडिएको छ। अहिले दुवै पार्टी मिलेको अवस्था छ। दुवै नेता एउटै पार्टी (नेकपा)को जिम्मेवारीमा हुनुहुन्छ तर समान हैन, फरक हैसियतमा। प्रचण्ड एकीकृत नेकपाका अध्यक्ष हुनुहुन्छ भने नेपाल सोही पार्टीको चौथो वरीयताको वरिष्ठ नेता हुनुहुन्छ। यो समाचार नेपाल समाचारपत्र राष्ट्रिय दैनिक अखबारमा प्रकाशित छ। समाचार मधुसूदन रायमाझीले लेखेका हुन्।

पार्टी एकीकरण भएको १५ महिनाको अवधिमा नेकपाले सांगठनिक एकताको काम करिब-करिब टुंगो लगाउने अवस्थामा पुगेका बेला नेता नेपालको वरीयता खोसिएपछि नेकपामा अध्यक्ष केपी शर्मा ओली र नेता नेपालबीचको विवाद सतहमा नै आएको छ। सचिवालय बैठकमा ओली र नेपालबीचको भनाभनले नयाँ परिस्थिति उत्पन्न गराएको छ।