कामदार नआएपछि बाईबाई चाउचाउको भयो बिल्लीबाड

कामदार आन्दोलित बनेपछि सुनसरीको गढी गाउँपालिकाको औरावनीमा सञ्चालित सीजी फुड्स इन्ड्रस्टिज प्रालिको उत्पादन प्रभावित बनेको छ ।

कम्पनीको नियम विरुद्ध आन्दोलित कामदारको हड्तालका कारण वाइवाइ चाउचाउ उत्पादन गर्दै आएको सीजी फुड्स प्रालि दुई दिनयता बन्द छ । २ सय २० कामदार एकसाथ आन्दोलनमा उत्रिएपछि उद्योग सञ्चालनमा आउन सकेको छैन । आन्दोलनका कारण उद्योगको उत्पादन प्रभावित बन्दा चाउचाउ र भुजिया गरी १३ हजार कार्टुन उत्पादन कटौती भएको छ ।

हड्तालका कारण दैनिक एक करोड बढीको नोक्सानी सहनु परेको उद्योग प्रशासनले जनाएको छ । उद्योगका प्रशासकीय अधिकृत तथा प्रवक्ता श्याम पोखरेलका अनुसार कामदारको आन्दोलनले दैनिक ७० लाख बराबरको सामान उत्पादन प्रभावित बनेको छ । आन्दोलित कामदारहरूले खाजा, नास्ता खाने र शौचालय जाने जस्ता सवालमा समेत कम्पनीले कडाई गरेकाले उद्योग विरुद्ध आन्दोलनमा उत्रिनु परेको बताएका छन् ।

आन्दोलित कामदार मध्येका कृष्ण चौधरीले उद्योग कामदारको हकहितको पक्षमा नदेखिएकाले आन्दोलित बन्नु परेको बताए । खाना खानको लागि घर जान पाउनुपर्ने आफूहरूको अडानलाई उद्योगले बेवास्ता गरेको उनी बताउँछन्् । उद्योगभित्रै रहेको क्यान्टिनमा जबरजस्ती खाना, नास्ता खानुपर्ने बाध्यता सिर्जना गराउन उद्योगले आफूहरूलाई कडाइ गरेको चौधरीको भनाइ छ । चौधरीले आफूहरूको एकमात्र माग खानाका लागि उपलब्ध गराइने समयमा उद्योग बाहिर निस्कन पाउनुपर्ने रहेको बताए । खानाकालागि आधा घण्टाको समय अपुग भएको समेत कामदारको गुनासो छ ।

कामदारको गुनासो र आन्दोलनका सवालमा उद्योग प्रशासनले भने बेतुकको राजनीति लाद्न खोजेको प्रतिक्रिया दिएको छ । कामदारको सवालमा कम्पनीबाट उपलब्ध हुने सबैखाले सेवा र सुविधा उपलब्धताका बाबजुद कामदार आन्दोलनमा उत्रिनुलाई उद्योगले व्यक्तिगत स्वार्थ साध्ने केही व्यक्तिको उक्साहट र बदनियत पूर्ण कार्य भनेको छ ।