चाँदबेलाको एक सरकारी बिद्यालयको माटो उत्खनन् गरेर बेचेको स्थानियको आरोप

सुनसरीका इनरुवा ७ चाँदबेलास्थित नेपाल राष्ट्रिय हरि माबिको जमिनको माटो बेचेको भन्दै स्थानियहरुले बिरोध गरेका छन् ।  बिद्यालयको करिब २ बिगाह जमिनमा माछा पोखरीको लागि खनिएको माटो स्थानिय इटा उघोगलाई बेचेपछि स्थानियहरुले बिरोध गरेका हुन् । बिद्यालय व्यवस्थापन समितिको बैठकले पोखरी खनेको माटो बिद्यालय परिसरको खाल्डो पुर्न सहमति दिएपनि माटो भने उघोगलाई बेचेको स्थानियको आरोप छ ।

बिद्यालयदेखि केही किलोमिटर पूर्वमा रहेको अर्काे जमिनमा अहिले माटो खन्ने काम भइरहेको छ । माटो खनेको ३ दिन बित्दा समेत एक टिपर माटो अहिलेसम्म बिद्यालयको खाल्डोमा नहालेको स्थानिय नेता दुर्गेश चौधरीले बताए ।

बिद्यालय व्यवस्थापन समितिको निर्णय भन्दा बाहिर गएर माटो बेचेको उनले बताए । माटो बेच्ने कार्यमा बिद्यालय व्यवस्थापन समितिका अध्यक्ष जय कुमार सिंह लागेको चौधरीले आरोप लगाएका छन् ।

यता व्यवस्थापन समितिका अध्यक्ष जय कुमार सिंहले भने बिद्यालयको खाल्डो पुर्नको लागि पोखरी खनेको बताउदै बिद्यालयको अन्तिरिक आम्दानी बढाउन माटो बेचेको बताए ।

बिद्यालय मातहतको जमिनबाट बिद्यालयको आर्थिक स्रोत बढाउन माछा पालन गर्न समितिले दिएको निर्णय सहि भएको र माटो बेच्ने काम पनि नियम भित्रै रहेर गरेको उनको भनाई छ । सिंहले केही दिन भित्रै बिद्यालय परिसरको खाल्डो समेत पुरिने बताए ।