अपाङगता भएका व्यक्तिहरुलाई फाइबरको सिरक र टोपी

सुनसरीको लौकहीमा पूर्ण र अति अशक्त अपाङगता भएका १ सय बढी व्यक्तिहरुलाई फाइबरको सिरक वितरण गरिएको छ । सामाजिक अभियन्ता दिनेशकुमार लम्सालले आफु तथा दाताहरुबाट जुटाएको सहयोग औपचारिक कार्यक्रमका बिच पूर्ण र अति अशक्त अपाङगता भएका व्यक्तिहरुकालागि प्रदान गरिएको हो ।

इलाका प्रहरी कार्यालय लौकहीको आयोजना र वर्णमाला दैनिकसँगको समन्वयमा आयोजित कार्यक्रममा अपाङगता भएका व्यक्तिहरुलाई गाउँपालिका अध्यक्षहरु ऐयुब अन्सारी, महेन्द्र यादव सहित सुनसरीका प्रहरी प्रमुख यज्ञबिनोद पोखरेल र ट्राफिक प्रहरी प्रमुख भीम दाहालले फाइबरको सिरक र न्यायो टोपी वितरण गरेका हुन् ।
समुदाय प्रहरी साझेदारी कार्यक्रमसँग जोडेर टोपी र फाइबरको सिरक वितरण कार्यक्रमको आयोजना गरिएको कार्यक्रम आयोजक इलाका प्रहरी कार्यालय लौकहीका इन्चार्ज शिव शर्माले जानकारी दिए ।
सामाजिक अभियन्ता लम्सालले यसअघि इनरुवामा रहेका १ सय ६५ जना अपाङगता भएका व्यक्तिहरुलाई फाइबरको सिरक वितरण गरिसकेका छन् । लम्सालले सामुदायिक विद्यालयमा पुगेर विपन्न समूदायका बालबालिकाहरुकालागि न्यायो टोपी लगाईदिने कार्यक्रमलाई समेत निरन्तरता दिईरहेका छन् ।