भाइ र भतिजी मिलेर दाजुको हत्या

ताप्लेजुङमा आफ्नै दाजुको हत्या गरेको अभियोगमा भाइसहित दुई जना पक्राउ परेका छन् ।मेरिङ्देन गाउँपालिका– ५ थुकिमाका ६२ वर्षीय फुर्वा ग्याबे शेर्पाको हत्या अभियोगमा मृतकका कान्छा भाइ पेम्बा शेर्पा र भतिजी पाशाङ ल्हामु शेर्पालाई पक्राउ गरिएको हो ।

आफ्नै गोठमा मृत अवस्थामा भेटिएका फुर्वाको हत्या आशंका साउन १९ गते उनीहरूलाई नियन्त्रणमा लिई सोधपुछ गर्ने क्रममा आफूहरूले नै हत्या गरेको स्वीकार गरेपछि शुक्रबार जिल्ला अदालतबाट म्याद थप गरी ज्यानसम्बन्धी कसूर मुद्दामा अनुसन्धान थालिएको जिल्ला प्रहरी कार्यालय ताप्लेजुङका प्रमुख डिएसपी महेन्द्रकुमार श्रेष्ठले जानकारी दिए ।

फुर्वा गत साउन १२ गते घरदेखि करिब ६ घण्टा पैदल दूरीमा पर्ने आफ्नै गोठमा मृत अवस्थामा फेला परेका थिए । प्रारम्भिक अनुसन्धानका क्रममा दुई वर्ष अघिदेखि नै सामान्य विषयमा उनीहरूबीच विवाद चल्दै आएको पाइएको डिएसपी श्रेष्ठले बताए