प्रेस युनियन सुनसरीले सुरु गर्यो ‘फुड बैंक’

 युनियनको सुनसरी जिल्ला कार्य समितिको बसेको बैठकले कोरोना संक्रमणको महामारीका कारण सृजना भएका समस्याले जीविकोपार्जनमै संकटको अवस्था झेलिरहेका श्रमजीवी पत्रकारका लागि ‘फुड बैंक’ संचालन गर्ने निर्णय गरेको हो।

कोरोना महामारीको समयमा मिडिया हाउसहरुले श्रमजीवि पत्रकारलाई कामबाट निष्कासन गर्ने, दबाब दिएर विदामा बस्न बाध्य पार्ने, तलव–भत्ता कटौती गर्ने, नियमित पारिश्रमिक नदिनेसँगै कतिपय सञ्चार गृह बन्द भएका र केही आंशिक रुपमा सञ्चालन भएकाले विद्यमान समस्यालाई मध्यनजर गर्दै ‘फुड बैंक’ अभियान सञ्चालन गर्ने निर्णय गरेको युनियन सुनसरीका उपाध्यक्ष सन्जिब वाग्लेले जानकारी दिए।

साेमबार बसेको युनियनको भर्चुअल बैठकले कोरोना महामारीले गर्दा पत्रकारले सवैभन्दा बढी समस्या झेल्नु परेकाले पेशा जोगाउनै गाह्रो रहेकाले राहत होस् भनेर आँफूहरुले फुड बैंक सुरु गरेको युनियन सुनसरीका अध्यक्ष पवन अधिकारीले बताए।

पुर्व अध्यक्ष अधिकारीको नेतृत्त्वमा समिति गठन

 

‘फुड बैंक’ संचालन एवंम् ब्यवस्थापनका लागि अग्रज पत्रकार एवम युनियनका पूर्व अध्यक्ष समेत रहेका कृष्ण अधिकारीको नेतृत्वमा पाँच सदस्यीय समिति तयार गरिएको छ। उक्त समितिमा पत्रकार निशान चौधरी, उषाकिरण घिमिरे, इकवाल अहमद र बिनय प्रधान रहेका छन्।

जिल्लाको इटहरी, धरान इनरुवा, झुम्का, दुहवी, बराहक्षेत्र लगायतका स्थानमा पत्रकार छरिएकाले गर्दा ती पत्रकारलाई खाद्य सामग्री वितरण गर्न पनि समितिले आवश्यक व्यवस्था गर्ने बताइएको छ। पत्रकारको हकहितका लागि नेपालमै पहिलोपटक फुड बैँक सञ्चालन गरिएको हो।

नेपाल प्रेस युनियन सुनसरीमा २०० भन्दा बढी पत्रकार आवद्द छन भने पत्रकारहरुको छाता सङ्गठन नेपाल पत्रकार महासंघ सुनसरीमा २०८ जना पत्रकार आवद्द रहेका छन।