पछिल्लो एक दशकमा कोरियामा ८८ जना नेपालीको मृत्यु भएको भने १९ जनाले आत्महत्या गरेका छन् ।
रोजगार अनुमति प्रणाली (ईपीएस) शाखाका अनुसार प्रत्येक वर्ष सरदर नौ जनाले ज्यान गुमाउने गरेको देखिएको छ ।
यो वर्षको ६ महिनामा मात्रै ६ जनाले ज्यान गुमाएका छन् । जसमा एक जना कामदारले आत्महत्या गरेका छन् भने एक जनाको स्वाभाविक मृत्यु भएको थियो । यस्तै दुई जनाको सुतेको अवस्थामा र दुई जनाको कार्यस्थल दुर्घटनामा परी ज्यान गएको हो ।
१० वर्षमा नेपालबाट ६० हजारभन्दा बढी युवा रोजगारीको सिलसिलामा कोरिया पुगिसकेका छन् । १० वर्षमा सुतेकै अवस्थामा मृत्यु हुनेको संख्या १५, कार्यस्थल दुर्घटनामा परी १२ जनाको मृत्यु भएको छ ।
किन आत्महत्या ?
कोरियामा कामको बोझले नेपालीहरु आत्महत्या गर्ने गरेको बताइन्छ । काम बढी तर सोचेजति आम्दानी नहुँदा निराशा उत्पन्न हुने गरेको छ ।
भाषा, संस्कृति तथा खानपान आफू सुहाउँदो नहुँदा, सहकर्मी र रोजगारदाताबाट दुव्र्यवहार हुँदा पनि कामदारले आत्महत्या गरेको हुन सक्ने बताइन्छ ।
यसबाहेक महारोग लागेको शंका, घरपरिवारले रकमको दुरूपयोग गरेको अवस्था, काम गर्न नसक्दा, नेपाल फर्कन नपाउँदा र कमजोर शारीरिक विचलनका कारण पनि आत्महत्या बढेको शाखाको भनाइ छ ।
अत्यधिक मदिरा सेवन गर्दा, नियमित स्वास्थ्य परीक्षण नगर्दा, व्यायामको अभाव हुँदा, अत्यधिक चिसोबाट एक्कासि तातो तथा तातोबाट चिसोमा बस्दा सुतेकैै अवस्थामा मृत्यु हुने गरेको अध्ययनले देखाएको छ ।
नेपालमा भाषा परीक्षा पास गरेकै भरमा जान पाउने तर त्यहाँ गएर शारीरिक परिश्रमको काम गर्नुपर्ने हुँदा पनि कामदारको कार्यस्थलमै मृत्यु हुने गरेको छ ।
यसैबीच नेपालले ईपीएस परीक्षा प्रणालीमा सुधार गर्ने तयारी गरेको छ । शाखाले सन् २०२० देखि रोजगारीका लागि कोरिया जाने कामदारले सिप परीक्षा पनि पास गर्नु पर्ने गरी नयाँ व्यवस्था लागू गर्न लागेको हो ।
