प्याब्सन प्रदेश १ को निर्वाचन : अध्यक्षमा टिकाराम ढकालको एकल उम्मेदवारी

विराटनगर । निजी आवासीय विद्यालय अर्गनाइजेशन नेपाल (प्याब्सन) प्रदेश १ को नयाँ नेतृत्व सर्वसम्मत हुने भएको छ ।

नयाँ नेतृत्वको लागि बिहीबार निर्वाचन हुँदैछ । मंगलबार भएको मनोनयनमा प्याब्सन प्रदेश १ को अध्यक्षको लागि टिकाराम ढकालको मात्र उम्मेदवारी परेको निर्वाचन समितिले जनाएको छ । उनी प्याब्सन प्रदेशका वरिष्ठ उपाध्यक्ष हुन् । उनी प्याब्सन मोरङको पूर्व अध्यक्ष पनि भइसकेका छन् ।

अध्यक्षमा ढकालको एकल उम्मेदवारी परेकोले उनी निर्विरोध निर्वाचित हुने सुनिश्चित भएको हो । यस्तै वरिष्ठ उपाध्यक्षमा सुमित थापाले उम्मेदवारी दर्ता गराएका छन् । दुई जना उपाध्यक्ष पदमा तीन जनाको उम्मेदवारी परेको छ । उपाध्यक्षमा जीवन पनेरु, ज्ञान कुमार दाहाल र अर्जुन बस्नेतको उम्मेदवारी रहेको छ । यस्तै सचिवमा कोषराज प्याकुरेल, कोषाध्यक्षमा राजेश आचार्य, सहसचिव विष्णुप्रसाद कोइराला र सहकोषाध्यक्षमा युसुभ पाण्डेको उम्मेदवारी परेको छ ।

दुई जना उपाध्यक्षका लागि तीन जनाको उम्मेदवारी दर्ता भएपनि बिहीबार साँझसम्म सहमति गरेर सर्वसम्मत रुपमा नेतृत्व चयन गर्न प्याब्सनका केन्द्रीय नेतादेखि प्रदेशसम्म लागि परेका छन् ।

यस्तै पाँच जना सदस्यको लागि ८ जनाको उम्मेदवारी दर्ता भएको निर्वाचन कार्यालयले जनाएको छ । सदस्यमा भानुभक्त राजवंशी, संजिव कुमार प्रधान, ज्ञान कुमार लिम्बू, रुक्मीणा गौतम, निश्चल राज शाक्य, डिक बहादुर थापा, भुवन श्रेष्ठ र विश्वास ढकालको उम्मेदवारी परेको छ ।

शुक्रबार विहान ८ बजेसम्म मनोनयन फिर्ताको समय रहेको छ । मोरङको उर्लाबारीमा बिहीबार हुने प्याब्सन प्रदेशको तेस्रो अधिवेशनमा ४ सय ५९ जना प्रतिनिधि सहभागी हुनेछन् ।