प्रदेश २ को नाम अब ‘मधेस प्रदेश’ स्थायी राजधानी ‘जनकपुर’

इटहरी । प्रदेश नम्बर २ को नाम अब ‘मधेस प्रदेश’ भएको छ । प्रदेशसभामा आज भएको मतदानबाट प्रदेशको नाम मधेश राख्नु पर्छ भन्ने प्रस्तावको पक्षमा ८० मत परेको छ । जम्मा ९९ सांसद मतदान प्रक्रियामा सहभागी भएका थिए ।

आजै प्रदेशको राजधानी ‘जनकपुरधाम’ कायम गरेको प्रदेश १ को प्रदेशसभा बैठकले आजै नामको पनि टुंगो लगाएको हो ।

बैठकमा पहिलो एजेण्डाको रुपमा प्रदेशको नाम ‘मधेस’ राख्नुपर्छ भन्ने प्रस्तावमा छलफल भएको थियो । उक्त प्रस्ताव पारित भएसँगै प्रदेश २ को नाम ‘मधेस प्रदेश’ भएको छ ।

यसअघि ‘मधेस’ नाममा कांग्रेस र एमालेको असहमति रहँदै आएको थियो । तर, वर्तमान सत्ता गढबन्धनका आधारमा कांग्रेसले पनि ‘मधेस’ कै पक्षमा मतदान गरेको छ । नेकपा माओवादी केन्द्रले यसअघि नै नाम ‘मधेस’ नै हुनुपर्ने पक्षमा थियो ।

प्रदेश २ मा जसपाको ३९, नेपाली कांग्रेसको १९, लोकतान्त्रिक समाजवादी पार्टीको १६, नेकपा एकीकृत समाजवादीको १३, नेकपा एमालेको ८, नेकपा माओवादी केन्द्रको ८ र नेपाल संघीय समाजवादी पार्टीको १ प्रदेशसभा सदस्य रहेका छन् । यसै बिच

प्रदेश २ को स्थायी राजधानी तोक्न भएको मतदान प्रक्रियामा ‘जनकपुर’ पारित भएको छ ।

सभामुख सरोजकुमार यादवको संयोजकत्वमा गठित विशेष संसदीय समितिले राजधानीका लागि प्रस्ताव गरेको पहिलो प्रस्ताव ‘उत्तरमा धनुषा ढल्केवरको पूर्व(पश्चिम लोकमार्ग, पूर्वमा कमला नदी, दक्षिणमा नेपाल भारतको दशगजा सिमाना र पश्चिममा मिथिला माध्यमिकी परिक्रमाक्षेत्र भित्रको सम्पूर्ण भूभाग सिमाना कायम’ गरी राजधानी बनाउने प्रस्ताव पारित भएको हो ।

यो प्रस्तावको पक्षमा ७८ मत प्राप्त भएको छ भने विपक्षमा अन्य मत परेको थियो । मतदानमा ९९ जना सांसदले सहभागीता जनाएका थिए । राजधानी सम्बन्धी प्रस्ताव पारित हुन प्रदेशसभाको कुल १ सय ४ सदस्यको दुई तिहाई ६८ मत हुन्थ्यो ।