सुनसरीमा दुर्घटना : उद्धार गर्दागर्दै आगलागी, सवारीसाधनभित्रै जले तीन जना

इटहरी । २५ वर्षीय निहाल प्रधान हेटौँडा जानका लागि झापाको काँकडभिट्टाबाट शुक्रबार साँझ ना ८ ख ८४९३ नम्बरको बसमा चढे ।भारतको पश्चिमबङ्गाल बस्ने उनी आफन्तको बिहेका लागि नेपाल आएका थिए ।

पश्चिमबङ्गालदेखि शुक्रबार दिउँसो काँकडभिट्टा आइपुगेका उनी हेटौँडाका लागि बस चढेका हुन् । तर निहाल हेटौँडास्थित आफन्तको बिहेमा पुग्नै सकेनन् । न त उनी अब कहिल्यै पुग्न नै सक्छन् ।

हेटौँडा हिँडेका उनले सुनसरी पनि कट्न पाएनन् । निहाल चढेको बस सुनसरीको भोक्राहानरसिंह गाउँपालिका–३ र कोसी गाउँपालिका–१ को सिमानामा रहेको खुनिया पुलमा सिमेन्ट लोड गरिएको ना ५ ख २९९६ नम्बरको ट्रकमा ठोक्किएर दुर्घटनामा पर्यो । त्यही दुर्घटनामा परेर उनको मृत्यु भयो ।

चालकदेखि पछाडिको सिटमा उनी बसेका थिए । दुर्घटनापछि सिटले च्याप्दा उनी बाहिर निस्कनै सकेनन् । न त उद्धार गरेर अरुले बाहिर निकाल्न नै सके । प्रहरी र स्थानीयले उद्धार थालेसँगै उनले आफूलाई बाहिर निकालिदिन हारगुहार गरेका थिए । खुट्टा काटेर भए पनि आफूलाई बाहिर निकालिदिन आग्रह गर्दै उनी चिच्याइरहे ।

उनलाई बाहिर निकाल्ने प्रयास पनि गरियो । तर सिटले कम्मरदेखि मुनिको भाग च्यापेपछि उद्धार सम्भव भएन । दुर्घटनामा परेको ट्रकमा केहीबेरमै आगलागी सुरु भयो । आगो बसमा पनि सल्कियो । बसभित्रै च्यापिएका निहालको दुर्घटनापछि दनदनी दन्किएको आगोमा जलेर मृत्यु भएको सुनसरी प्रहरी प्रमुख एसपी सञ्जयसिंह थापाले जानकारी दिए ।

उनका अनुसार झापाको काँकडभिट्टाबाट यात्रु लिएर काठमाडौंतर्फ जाँदै गरेको बस र विपरीत दिशाबाट आउँदै गरेको सिमेन्ट लोड गरिएको ट्रक ठोक्किएर शुक्रबार साँझ ७ः३५ बजेतिर भयानक दुर्घटना भएको हो । दुर्घटनामा बसका यात्रु निहालसँगै बसका चालक झापाको हल्दिबारी गाउँपालिका–१ गोलधापका ४५ वर्षीय सरोज राई र ट्रक चालक बाराको निजगढ–९ का २७ वर्षीय शेख फिरोजको मृत्यु भयो ।

आगलागी सुरु हुनुअघि उनीहरु सवारीसाधनभित्रै च्यापिएको र घाइते अवस्थामा चिच्याइरहेका थिए । उद्धारका लागि उनीहरुले हारगुहार गरिरहँदा पनि बचाउन नसक्दा साह्रै पछुतो लागिरहेको उद्धारमा खटिएका एक प्रहरीले बताए । ‘बसको सिसा फुटाएर घाइते अवस्थाका अरुको यात्रुको उद्धार गर्न सफल भए पनि दुवै सवारीका चालक र बसका एक जना यात्रुभित्रै च्यापिएका थिए । खुट्टा काटेर भए पनि बाहिर निकालिदिनु भनेर हारगुहार गरिरहे,’ उनले भने, ‘बारम्बार बचाउ–बचाउ भनेर चिच्याइरहेको दर्दनाक दृश्य देखिरहँदा पनि आगो दन्किएपछि हाम्रो केही उपाय लागेन । सवारीसाधनभित्रै जलेर केही बेरमै उनीहरुको मृत्यु भयो ।’

बस र ट्रक ठोक्किएर दुर्घटना भएको केहीबेरमा दुवै सवारीसाधनमा भिषण आगलागी भएको थियो । च्यापिएकाहरुलाई बाहिर निकाल्ने प्रयास असफल हुँदा बस र ट्रकभित्रै जलेर तीन जनाको मृत्यु भएको प्रहरीले जनाएको छ । दुर्घटनास्थलनजिकै रहेको प्रहरी टोली स्थानीयको सहयोग लिएर तत्कालै उद्धारमा खटिएको थियो । तर दुर्घटनाको केहीबेरमै बस र ट्रकमा आगलागी हुँदा उद्धारमा समस्या भएको प्रदेश १ ट्राफिक प्रहरी प्रमुख एसपी बासुदेव खतिवडाले बताए । उनका अनुसार उद्धार कार्य जारी रहेका बेला ट्रकबाट अचानक आगलागी सुरु भएको हो । त्यसपछि बसमा पनि आगो सल्कियो ।

दमकलले पनि निभाउन सम्भव नभएपछि उद्धारमा कठिनाई हुँदा बस र ट्रकभित्र च्यापिएकामध्ये तीन जनाको त्यहीँ जलेर मृत्यु भएको जानकारी खतिवडाले दिए । उनका अनुसार उद्धारमा ठुलो सङ्ख्यामा सुरक्षाकर्मी र स्थानीय खटिएका थिए । ‘अधिकांश घाइतेहरु बसभित्र च्यापिएका थिए । उद्धार जारी रहेका बेला ट्रकबाट अचानक आगलागी सुरु भयो,’ उनले भने, ‘आगोको लप्कासँगै धुवाँको मुस्लो छुटेपछि उद्धार गर्न गाह्रो भयो । तर पनि सम्भव भएसम्म बसको सिसा फुटाउँदै घाइतेहरुलाई बाहिर निकालेर उपचारका लागि पठाइयो ।’

आगोले शरीररको सबै भाग जलेर चिन्नै नसक्ने अवस्थामा तीनवटा शवलाई पछि बाहिर निकालिएको थियो । एक प्रत्यक्षदर्शी दुर्घटनास्थलको दर्दनाक दृश्य हेर्नसक्ने अवस्थाकै नरहेको बताउँछन् । ‘बचाउ–बचाउ भनेर चिच्याएको र कराएको दर्दनाक दृश्य हेरेर बस्नेबाहेक अर्को विकल्प हामीसँग भएन,’ उनले भने, ‘उनीहरुलाई बाहिर निकाल्न सकिएन । हेर्दाहेर्दै तड्पाईतड्पाई आगोले जलाइदियो ।’ उद्धारमा खटिएका सशस्त्र र नेपाल प्रहरीको पोसाकसमेत आगोले जलेको थियो ।  

प्रहरीका अनुसार दुर्घटनामा २७ जना यात्रु घाइते भएका थिए । घाइतेहरुको मोरङ र सुनसरीका विभिन्न अस्पतालमा उपचार भइरहेको छ । अधिकांश घाइतेहरु उपचारपछि डिस्चार्ज भइसकेका छन् । दुर्घटना भएका बेला ट्रकभित्र भने चालकसँगै सहचालक बारा निजगढ–९ का ४३ वर्षीय दीपक श्रेष्ठ पनि थिए । दुर्घटनामा परेर घाइते भएका श्रेष्ठको उपचार जारी छ । बसको तीव्र गतिका कारण दुर्घटना भएको प्रहरीको प्रारम्भिक अनुसन्धानबाट खुलेको छ ।