कानेपाेखरीमा सुकुम्बासीको जग्गा हेर्न आउनेलाई ‘भू–माफिया’ भन्दै कुटपिट : बाचुञ्जेल फर्केर नआउने कागज गराएर छाडियाे

इटहरी । मोरङको कानेपोखरी गाउँपालिका ६ दहिधापमा जग्गा हेर्न आएका तीन जनालाई स्थानीयले ‘भू–माफिया’ भन्दै कुटपिट र उनीहरुले चढेको गाडी तोडफोड गरिदिएका छन् ।

स्थानीयले रामेछाप जिल्ला सुनपाती गाउँपालिका घर भई काठमाडौँ बस्दै आएका शेरबहादुर मगर, काठमाडौं जोरपार्टी ७ बस्ने पर्लादमान सिंह बस्नेत र सोलुखुम्बु दुधकुण्ड नगरपालिका बस्ने नूतन श्रेष्ठलाई भू–माफिया भन्दै कुटपिट गरेका हुन् । आक्रोशित स्थानीयले उनीहरु चढेर आएको बा ९ च ५७७२ नम्बरको कार पनि तोफोड गरिदिएका छन् ।

बिहीबार दहिधापमा वर्षौदेखि यहाँका सुकुम्बासीहरुले भोगचलन गर्दै आएका जग्गा हेर्न उनीहरु आएका थिए । जग्गा हेर्न आएका उनीहरुले फोटो खिच्न थालेपछि स्थानीयले भू माफिया आएको र यहाँका सुकुम्बासीलाई उठाउने सक्ने भन्दै कुटपिट गरेका थिए । ठूलो संख्यामा भेला भएका स्थानीय कुटपिट र तोडफोडमा उत्रिएपछि स्थायी प्रहरी चौकी रमाइलो, इलाका प्रहरी कार्यालय पथरी र सशस्त्र प्रहरी बल शनिश्चिरे पुगेको थियो । ठूलो संख्यामा सुरक्षाकर्मी खटाएपछि भीड नियन्त्रण लिएको प्रहरीले जनाएको छ ।

७ घण्टासम्म स्थानीयको घेराबन्दीमा रहेका उनीहरुलाई प्रहरीले बिहीबार साँझ इप्रका पथरी लिएर आएको डिएसपी कृष्ण खड्काले बताए । वर्षौदेखि बसोवास गर्दै आएका सुकुम्बासीहरुले भोगचलन गर्दै आएका जग्गाको फोटा र भिडियो खिच्ने गरेको देखेपछि भू–माफिया हुनसक्ने भन्दै स्थानीयले नियन्त्रणमा लिएर कुटपिट गरेको प्रहरीले जनाएको छ ।

प्रशासनको रोहबरमा तीन बुँदे सहमति गरेपछि उनीहरूलाई छोडेको थियो । उनीहरुलाई स्पटमै कायलनामा कागज पनि गराइएको छ । उक्त कागज गाउँपालिका न्यायिक समितिमा रहनेछ । कागजमा आउँदा दिनमा माफिया गिरी नगर्ने, सुकुम्बासीलाई दुःख नदिने, त्यस क्षेत्रमा नआउने उल्लेख छ । उक्त कागजमा उनीहरुले सहिछाप गरेपछि प्रहरीलाई जिम्मा लगाएको स्थानीय अम्बिका अर्यालले बताए ।

कानेपोखरीको गाउँपालिका भित्र झण्डै पाँच हजार घरदुरी सुकुम्बासी रहेका छन् । सबैभन्दा बढी कानेपोखरी ६ मा रहेको छ । कानेपोखरी ६ मा मात्र १ हजार ३ सय घरधुरी सुकुम्बासी रहेका छन् । नयाँ मान्छे आएर सुकुम्बासीले वर्षौदेखि भोगचन गर्दै आएको जग्गा आए यहाँका स्थानीय एकजुट भएर उनीहरुलाई लखेट्ने गरेका छन् ।

यसअघि २०७३ सालमा पनि यस्ता घटना भएको थियो । त्यसबेला पनि तीन जनामध्ये शेरबहादुर मगरले ठूलै ग्याङ ल्याएर नाप जाँप गर्दा स्थानीय र उनीहरुबीच झडप भएको अर्यालले बताए । तीन जनामध्ये शेरबहादुर मगर भू–माफियाको मुख्य नाइके थिए ।