भेडेटारमा स्काइवाक सञ्चालनमा

भेडेटारमा स्काइवाक सञ्चालनमा धनकुटा —मुलुककै पर्यटकीय गन्तव्यमध्येको चर्चित स्थल भेडेटारमा निर्माण भएको स्काइवाक (सिसामा हिंड्ने पुल) शुक्रबारदेखि सञ्चालनमा आएको छ । कोशी प्रदेशका मुख्यमन्त्री हिक्मतकुमार कार्कीले टावरको उद्घाटन गरेका छन् ।
भेडेटार स्काइवाक परियोजनाको निजी साझेदारीअन्तर्गत कोशी प्रदेशको यो पहिलो परियोजना हो । सञ्चालन भएको पहिलो दिन नै झन्डै एक हजार बाह्य तथा आन्तरिक पर्यटकले स्काइवाक टावर चढेका छन् ।

धनकुटाको साँगुरीगढी गाउँपालिका–४ र धरान उपमहानगरपालिका–६ को संगमस्थल भेडेटारस्थित चार्ल्स प्वाइन्टमा उक्त टावर निर्माण गरिएको हो । कोशी प्रदेश लगानी प्राधिकरण, धनकुटाको साँगुरीगढी गाउँपालिका र सुनसरीको धरान उपमहानगरपालिकाको समन्वयमा उक्त स्काइवाक निर्माण गरिएको हो । दुई वर्षमा सम्पन्न गर्ने उद्देश्यले चार वर्ष पहिले २०७७ फागुन ९ मा प्रदेश लगानी प्राधिकरण र विकासकर्ताबीच परियोजना विकास सम्झौता भएको थियो ।