काठमाडौँ प्रहरी परिसरका डीएसपी हरि खतिवडा असोज महिनाका ‘उत्कृष्ट प्रहरी’ घोषित

काठमाडौं /काठमाडौं प्रहरी परिसरमा कार्यरत प्रहरी नायव उपरीक्षक (डीएसपी) हरि खतिवडा असोज महिनाका लागि ‘उत्कृष्ट प्रहरी’ घोषित भएका छन्। काठमाडौं प्रहरी परिसरले उनलाई ‘पुलिस अफ द मन्थ’ अवार्ड दिने निर्णय गरेको हो।

काठमाडौँ जिल्लाको शान्ति सुरक्षा र अपराध अनुसन्धानमा खतिवडाले पुर्‍याएको योगदानलाई मध्यनजर गर्दै प्रहरी प्रमुख एसएसपी बसन्त रजौरेले यो सम्मान प्रदान गर्ने निर्णय गरेका हुन्।

प्रहरी संगठनले दिएको जिम्मेवारीलाई विभागीय मूल्य–मान्यता, आदेश–निर्देशन पालना गर्दै व्यवसायिक, लगनशील र कर्तव्यनिष्ठताका साथ डीएसपी खतिवडाले आफ्नो भूमिका निभाउँदै आएका छन्। अपराध अनुसन्धानमा उल्लेखनीय योगदान गर्दै उनले विभिन्न अपराधमा संलग्न प्रतिवादीहरूलाई पक्राउ गरी कानूनी कारबाहीमा ल्याउन महत्त्वपूर्ण भूमिका निर्वाह गरेका छन्।

यससँगै, सुरक्षामा विश्वासको वातावरण सिर्जना गर्दै नागरिकहरूसमक्ष प्रहरीको सकारात्मक छवि प्रस्तुत गर्न खतिवडाले योगदान गरेका छन्।

प्रहरी कर्मचारीहरूको मनोबल उच्च राख्न र उनीहरूको कामको उचित मूल्याङ्कन गर्दै काठमाडौं प्रहरी परिसरले प्रत्येक महिना उत्कृष्ट प्रहरी छनोट गर्दै आएको छ।