ताप्लेजुङमा सामान्य हिमपात

६ मंसिर, ताप्लेजुङ : ताप्लेजुङमा अवस्थित पाथीभरा धाम क्षेत्रमा यो वर्षको पहिलो पटक सामान्य हिमपात भएको छ। केही दिनयता चिसो बढिरहेको यस क्षेत्रमा आज बिहानैदेखि हल्का हिमपात भएको पाथीभरा क्षेत्र विकास समितिले जानकारी दिएको छ।

हिमपातसँगै मौसम अझै चिसो बनेको छ । हिमपातले चिसो बढेपनि हिउँ परेको दृश्यले पर्यटक र तिर्थयात्रीलाई आकर्षित गर्ने र आगन्तुकको संख्या बढ्ने अपेक्षा गरिएको समितिका कार्यकारी निर्देशक प्रजिन हाङबाङले बताउनुभयो ।

पाथीभरा मन्दिर, धार्मिक र पर्यटकीय हिसाबले निकै महत्वपूर्ण मानिने स्थान भएकाले हिउँ परेको समयमा यस क्षेत्रमा वर्षेनि आन्तरिक पर्यटकहरूको आगमन बढ्ने गरेको छ ।
३ हजार ७ सय ९४ मिटरको उचाइमा पर्ने मन्दिर क्षेत्रमा हिमपातको कारण यातायातमा समस्या नआए पनि चिसोबाट जोगिन तिर्थयात्रीहरूले सतर्कता अपनाउनुपर्ने पाथीभरा क्षेत्र विकास समितिले सुझाव दिएको छ।