तमोर किनारमा १० क्वीन्टल बढी गाँजा जलाइयो

धनकुटास्थित तमोर नदीको किनारमा प्रहरीले १० क्वीन्टल बढी गाँजा जलाएर नष्ट गरेको छ । विभिन्न समयमा बरामद गरेर राखिएको गाँजा प्रहरीले शनिबार अपरान्ह १२ बजेतिर जलाएको हो । धनकुटा प्रहरीका प्रवक्ता डीएसपी ओमप्रकाश खनालका अनुसार जिल्लाका विभिन्न प्रहरी युनिटले बरामद गरेको गाँजा एकै ठाउँमा जम्मा पारेर जलाइएको हो । उनले १ हजार ६८ किलो गाँजा नष्ट गरिएको जानकारी दिए । धनकुटा नगरपालिका–९ मुलघाटस्थित तमोर नदीको किनारमा तयारी अवस्थाको लागुऔषध गाँजा जलाइएको खनालले बताए ।