इटहरीका एमाले जनप्रतिनिधिले भने "मेयरको कारण सबै समस्या आएको हो"

प्रकाशित मितिः साउन २, २०८२
587 पटक पढिएको
समय अनलाइन

इटहरी : नेकपा एमालेका जनप्रतिनिधिले इटहरी उपमहानगरपालिकाको आर्थिक वर्ष २०८२/०८३ को बजेट अनुसूची बिना पास नहुने बताएका छन् । बिहीबार पार्टी कार्यालयमा पत्रकार सम्मेलन गर्दै एमालेका जनप्रतिनिधिले मेयर हेम कर्ण पौडेलको कारण बजेट होलिडेको अवस्था आएको बताएका हुन् ।

उपमेयर सङ्गीता चौधरीले हतारमा बजेट निर्माण गर्ने प्रचलन विगत देखि भएको र अनुसूची बिनै बजेट पास गर्ने परम्परालाई ब्रेक गरिएको बताइन् ।

३० गतेको सभामा विनियोजन विधेयक र अर्थ विधेयक पेस गर्नु पर्ने र ३२ गते भित्रमा अनुमोदन गर्नु पर्ने कानुनी व्यवस्थाको उलङ्घन भएको उनको भनाइ छ ।

अनुसूची बिनाको विनियोजन विधेयक पेस गरी बजेटलाई मेयर पौडेलले मनोमानी शीर्षकहरूमा खर्च गरी दुरुपयोग गर्ने गरेको उनको आरोप छ ।

महालेखा परीक्षकको प्रतिवेदनमा समेत बेरुजु बढ्दै गरेको देखिए‌कोले त्यसबाट पाठ सिक्दै विनियोजन विधेयक सहितको बजेट ल्याउनुपर्ने उनको जोड छ ।