विपीको साख फर्काेउने अपेक्षा गरिएका उपकुलपति डा. विक्रम श्रेष्ठ

सुनसरी । पछिल्लो दशक यता विपी कोइराला स्वास्थ्य विज्ञान प्रतिष्ठानमा समस्याको चाङ लागेको छ । बेतिथी मौलाएको छ, अनियमितताको जालो झाँगिँदै गएको छ । कुनै समय प्रशंसाको भागेदार बनेको प्रतिष्ठानमाथि आलोचनाको ओइरो लाग्ने गरेको छ । यस्तो अवस्थामा प्रतिष्ठानको उपकुलपतिको रुपमा भर्खरै हाडजोर्नी विशेषज्ञ प्रा. डा. विक्रम श्रेष्ठ नियुक्त भएका छन् । उनलाई प्रतिष्ठानको कुलपतिसमेत रहेका प्रधानमन्त्री केपी शर्मा ओलीले साउन २८ गते उपकुलपतिमा नियुक्त गरेका हुन ।

उनको नियुक्तिसँगै विपी कोइराला स्वास्थ्य विज्ञान प्रतिष्ठानको खस्कँदै गएको साख जोगिने विश्वास गरिएको छ । प्रतिष्ठानको गरिमा जोगाउने र बेतिथीको अन्त्य गर्ने दृढ संकल्प र विश्वास बोकेर उपकुलपतिलाई एकातिर प्रतिष्ठान सुधार्ने अवसर छ भने अर्काेतिर चुनौतीका अग्ला पहाडहरुले उनको यात्रालाई सहज बनाउने भने देखिँदैन । तथापी उनको नियुक्तिसँगै प्रतिष्ठानले एक इमान्दार, स्पष्ट वक्ता र कुशल नेतृत्व भने पाएको छ । उनको नेतृत्व गर्ने क्षमताले विपी कोइराला स्वास्थ्य विज्ञान प्रतिष्ठानको मुहार पक्कै पनि फेरिनेछ अपेक्षा गरिएको छ । प्रा.डा. श्रेष्ठलाई उपकुलपतिको रुपका पाउनु प्रतिष्ठान, धरानबासी, समग्र चिकित्सा क्षेत्रकै लागि एक उत्साह र आशाको रुपमा लिइएको छ ।

प्रा.डा. श्रेष्ठसँग बिपी प्रतिष्ठानको प्राध्यापक, परीक्षा डिन र रेक्टर सम्मको अनुभव छ । विपी प्रतिष्ठानको उपकुलपति दौडमा ४ जनाको नाम सिफारिश भएको थियो । तीन जनाको नाम मात्र सिफारिश गर्ने विगतको चलनविपरीत सर्च कमिटीले विपी प्रतिष्ठानको उपकुलपतिमा चार जनाको नाम पठाएको थियो । अन्तरर्वार्ता र प्रस्तुतीकरणपछि प्रा.डा. प्रह्लाद कार्की, प्रा.डा.रामेश कोइराला र प्रा.डा.रोहित यादवको नाम सर्च कमिटीले तय गरेको थियो । तर, प्रा.डा.श्रेष्ठलाई पनि सिफारिशमा छुटाउन नहुने भन्दै चर्को दबाब र लविङ भएको थियो । यसैको परिणाम स्वरुप सरकारले धराने जनता र प्रतिष्ठानको माग अनुसार प्रा.डा.श्रेष्ठलाई उपकुलपतिमा चयन गरिएको गर्भको बिषय भएको कोशी प्रदेश संसाद माननिय यशोदा कायस्थको भनाई छ ।

प्रतिष्ठानका नवनियुक्त उपकुलपति प्रा.डा. श्रेष्ठले साउन ३० गते पदभार ग्रहण गरेका छन् । उपकुलपति श्रेष्ठलाई प्रतिष्ठानस्थित उपकुलपति कार्यालय परिसरमा शिक्षाध्यक्ष प्रा.डा. सञ्जिव शर्मा, रजिष्ट्रार प्रा.डा. सुर्यप्रसाद संग्रौला, अस्पताल निर्देशक डा.जगतनारायण प्रसादसहित कर्मचारी, चिकित्सकहरुले भव्य स्वागत गरेका थिए । पदभारपछि न्यूज २४ सँगको पहिलो कुराकानीमा उपकुलपति श्रेष्ठले आफु प्रतिष्ठानको पुरानो मान्छे भएकै कारण प्रतिष्ठानको गिरेको मनोबल उठाउने प्रतिवद्धता जनाए । साथै सबैभन्दा ठुलो समस्याको जड कर्मचारी र प्रशासनबिचको बेमेल भएको बताउदै श्रेष्ठले ४ जना बिभागिय प्रमुखसँग मिलेर काम गर्ने बताए ।

त्यसो त विपी प्रतिष्ठान सुधारको योजनासहित उपकुलपतिमा नियुक्त भएका श्रेष्ठलाई काम गर्न सहज भने देखिँदैन । प्रतिष्ठानमा समस्याको जालो यसरी अल्झिएको छ कि त्यसलाई फुकाउन सजिलो पक्कै छैन । श्रेष्ठ इमान्दार, निर्णय गर्नसक्ने र हालसम्म विवादमा नपरेका चिकित्सक हुन् । त्यसैले जालो जसरी अल्झिएको विपी प्रतिष्ठानको समस्या क्रमश उनले फुकाउने अपेक्षा गरिएको छ । यसमा सबैभन्दा ठुलो भूमिका भनेकै प्रतिष्ठान भित्रको शिक्षाध्यक्ष, रजिष्ट्रार, अस्पताल निर्देशक र कर्मचारी बिच उपकुलपतिको दरिलो समन्वय र सहकार्य हो ।