उदयपुरको बेलका–३ रातापानीका युवाद्वारा पुल र सडक निर्माणको माग

उदयपुर जिल्ला अन्तर्गत बेलका नगरपालिका वडा नं. ३ रातापानीका युवाहरूले स्थानीय समस्याप्रति सम्बन्धित निकायको ध्यानाकर्षण गराउँदै रातापानी घुम्ने बाटो निर्माण तथा लालखरे खोलामा पुल निर्माणको माग गरेका छन्।
स्थानीय युवाहरूले मेयर अशोक कार्की लाई मागपत्र बुझाउँदै वर्षौंदेखि पुल नबन्दा रातापानी क्षेत्रका बासिन्दाले दैनिक रूपमा सास्ती खेप्नुपरेको बताएका छन्। वर्षायाममा खोलामा पानीको बहाव बढ्दा आवतजावत प्रभावित हुने, बिरामीलाई अस्पताल लैजान कठिन हुने तथा विद्यार्थीहरू विद्यालय जानसमेत समस्या हुने गरेको स्थानीयको गुनासो छ।
युवाहरूले रातापानी घुम्ने बाटो निर्माण नहुँदा स्थानीय बासिन्दा, किसान तथा सर्वसाधारणले यातायात, कृषि उपज ढुवानी र दैनिक कामकाजमा ठूलो समस्या झेल्दै आएको उल्लेख गरेका छन्। उनीहरूले स्थानीय सरकारसँगै प्रदेश सरकार र संघीय सरकारले पनि यस विषयलाई गम्भीर रूपमा लिनुपर्नेमा जोड दिएका छन्।
मागपत्र बुझाउने क्रममा युवाहरूले “विकासको मुख्य आधार सडक र पुल भएकाले अब आश्वासन मात्र होइन, तत्काल कामको सुरुवात हुनुपर्छ” भन्ने धारणा राखेका थिए। स्थानीयवासीले लामो समयदेखि उठाउँदै आएको यो मागप्रति सम्बन्धित निकायले चाँडो ध्यान दिई आवश्यक बजेट विनियोजन तथा निर्माण प्रक्रिया अघि बढाउनुपर्ने आवाज बलियो बन्दै गएको छ।

रातापानीवासीले पुल निर्माण र सडक स्तरोन्नति भएमा स्थानीय जनजीवन सहज हुनुका साथै शिक्षा, स्वास्थ्य, कृषि तथा समग्र विकासमा ठूलो टेवा पुग्ने विश्वास व्यक्त गरेका छन्।