बिरामीलाई निःशुल्क यातायात सेवा दिएको २३ महिना पूरा

खोटाङ जिल्लाको बराहपोखरी गाउँपालिका–६ मौवाबोटेका वडा सदस्य राजेन्द्र खड्का ले बिरामीका लागि सञ्चालन गर्दै आएको निःशुल्क यातायात सेवा २३ महिना पूरा भएको बताएका छन्।

वडा सदस्य खड्काले आफ्नै व्यक्तिगत पहलमा मौवाबोटे तथा आसपासका क्षेत्रका बिरामीलाई बेल्टार, धरान र विराटनगरसम्म उपचारका लागि पुग्न सहज होस् भन्ने उद्देश्यले निःशुल्क यातायात सेवा सञ्चालन गर्दै आएका हुन्। आर्थिक अवस्था कमजोर भएका तथा आकस्मिक उपचार आवश्यक परेका बिरामीलाई यस सेवाले ठूलो राहत पुर्‍याएको स्थानीयवासीको भनाइ छ।

सेवा सञ्चालनको २३ महिना पूरा भएको अवसरमा खड्काले स्थानीयवासीको साथ, सहयोग र विश्वासप्रति आभार व्यक्त गर्दै आगामी दिनमा पनि सेवा निरन्तर सञ्चालन गर्ने प्रतिबद्धता जनाएका छन्।

दुर्गम क्षेत्रका नागरिकलाई लक्षित गरी सञ्चालन गरिएको यो अभियान सामाजिक सेवाको उत्कृष्ट उदाहरण बनेको स्थानीयवासीले बताएका छन्।