सभापतिमा थापाको बलियो दाबेदारी

इनरुवा–५ भदौ । नेपाली कांग्रेसको १५औँ महाधिवेशनको सरगर्मी बढेसँगै सुनसरी क्षेत्र नं. २ मा क्षेत्रीय सभापतिका लागि सुमन थापाले आफ्नो दर्बिलो दाबेदारी प्रस्तुत गरेका छन्।
सुनसरी जिल्लामा पार्टीको वडा अधिवेशन सकिएसँगै इनरुवा नगरपालिकाका ६ का निर्वतमान वडा सभापतिसमेत रहेका थापाले वडा तहमा क्षेत्रीय प्रतिनिधिदेखि लिएर सम्पूर्ण कार्यसमिति नै सर्वसम्मत गराएर क्षेत्रीय सभापति पदमा आफूलाई उभ्याएका छन्।
इनरुवा नगरपालिकाका प्रवक्तासमेत रहेका थापा सुनसरीको क्षेत्र नं. २ का कांग्रेसजनका लागि लोकप्रिय नेताका रूपमा पनि चिनिँदै आएका छन्। क्षेत्र नं. २ इटहरीदेखि दक्षिणतर्फ भारतसँग सीमा जोडिएको भूभागसँग जोडिने हुनाले पनि क्षेत्रीय सभापति हुनका लागि जो कसैलाई पनि त्यति सजिलो क्षेत्र मानिँदैन। तर, थापा भने इटहरीदेखि दक्षिण सबैैतर्फका कांग्रेसजन कार्यकर्ताका मनमनमा बस्न सफल नेताका रूपमा चिनिँदै आएका इनरुवाका धनराज मोची बताउँछन्।
अघिल्लो १४औँ महाधिवेशनमा पनि थापाले आफूलाई क्षेत्रीय सभापतिमा नै उभ्याएका थिए तर पार्टीको निर्देशनबमोजिम उनी पछि हटेका थिए।
जो कोही बिरामी पर्दा होस् कि जो कसैलाई अप्ठ्यारो पर्दा थापा अग्रपंक्तिमा रहेर पुग्ने नेता भएका कारण पनि कांग्रेसजन कार्यकर्ताहरूले थापालाई नै रोज्ने गरेको कांग्रेसहरू नै बताउँछन्। उता नेता थापा भने पार्टीले आफूलाई योग्य ठानेर जहाँसुकै उठ भने पनि तयार रहेको तर आफ्नो इच्छा चाहिँ क्षेत्रीय सभापतिमा नै रहेको स्वीकार गर्छन्।