अनुगमनमा अवरोध गर्ने दुई पक्राउ

 सोमबार बिहान कालीमाटी तरकारी तथा फलफूल बजारको अनुगमनमा पुगेको वाणिज्य आपूर्ति तथा उपभोक्ता संरक्षण विभाग र प्रहरीको टोलीलाई व्यवसायीले कोठामा थुनेर धर्ना दिएका थिए।

पक्राउ पर्नेमा कालीमाटी तरकारी तथा फलफूल व्यवसायी संघका अध्यक्ष भरत खतिवडा र अर्का व्यवसायी विमल ढुंगाना रहेका छन्।

पक्राउ परेका खतिवडा र ढुंगानालाई महानगरीय प्रहरी परिसर टेकुमा राखेर अनुसन्धानन गरिरहेको प्रहरीले जनाएको छ।

व्यवसायीले अनुगमन टोलीलाई थुनेपछि उजनीहरुलाई छुटाउनका लागि प्रहरी नै परिचालन गर्नुपरेको थियो।

 सरकारी टोलीले काक्रो, फर्सी लगायत तरकारी लिएर ललितपुरबाट आएको बा ६ च ९६४ नम्बरको गाडी र बाराबाट तरकारी बोकेर आएको ना ४ च ६६३४ नम्बरको गाडीबाट बिल र कागजातमाग्दा नपाएपछि दुबै गाडीलाई नियन्त्रणमा लिएको थियो।

सरकारी टोलीले तरकारीको गाडी नियन्त्रणमा लिएपछि व्यापारीले विरोध गर्दै अनुगमनमा अवरोध गर्दै सरकारी टोलीलाई कोठाभित्र थुनेका हुन्।

आपूर्तिमन्त्री यादव कालीमाटी तरकारी बजार पुगे

यसैबीच उद्योग वाणिज्य तथा आपूर्तिमन्त्री मातृका यादव कालीमाटी तरकारी बजार पुगेका छन्।

व्यवसायीले अनुगमनमा अवरोध गरेपछि मन्त्री यादव आफै काठमाडौँका प्रमुख जिल्ला अधिकारी रामप्रसाद आचार्यसहितको टोली लिएर कालीमाटी पुगेका हुन्।

घटनाको अवस्थाका बारेमा बुझ्न मन्त्री यादव कालीमाटी पुगेको उनको सचिवालयले जनाएको छ।  

कालीमाटीका व्यापारीले यसअघि पनि सरकारी अनुगमन टोलीलाई पटक पटक अबरोध गर्दै आएका छन्। तरकारीमा विचौलिया हाबी हुँदा देशैभरीका तरकारी किसानले आफ्नो उत्पादनको उचित मूल्य पाउन सकेका छैनन्।