​वीपी प्रतिष्ठानमा डाक्टरले लापरवाही गरेको आरोप

धरान । बिपी कोइराला स्वास्थ्य विज्ञान प्रतिष्ठानमा एक गर्भवती महिलाको ज्यान गएको छ । महिलासँगै उनको पेटमा रहेको बच्चाको समेत मृत्यु भएको छ । 

धनकुटाको साँगुरीगढी गाउँपालिका २ की २८ बर्षीय गर्भवती मनिषा लिम्बूको मृत्यु भएको हो । कार्तिक २३ गते डेलिभरीको समय दिइएकी लिम्बुलाई व्यथाले नच्यापेपछि ३० गते प्रतिष्ठानमा भर्ना गरिएको थियो । 

तर आइतबार साँझ अचानक मनिषाको लेवर रुममा नपुगि वेडमा नै मृत्यु भयो । समयमा नै डाक्टर र नर्सले ख्याल नगरिदिदा मनिषाको मृत्यु भएका आफन्तहरुको आरोप छ ।

आइतबार बिहान व्यथा लाग्ने औषधी दिइएको थियो । पाठेघरको ६ घर खुलेपछि मनिषाले असाध्यै पीडा भएको बताएपछि नर्सलाई लेबर रुममा लैजान आग्रह गर्दा नर्सले झर्कदै कराएको पीडितका आफन्तहरुले बताएका छन् । 

गर्मी भयो भन्दै मनिषा बेडबाट उठेर चिसो भुईमा बसेकी थिइन् । त्यहीँ आँखा चिम्लिइन् । 
अनि मात्र डाक्टरले चासो दियो । तर ढिलो भइसकेको थियो ।

समयमा नै लेवर रुम नलगेको, राम्रो उपचार नगरेको आरोप मृतकका आफन्तहरुले लगाएका छन् । 

लापरवाहीले गर्भमा भएको बच्चासहित आमाको मृत्यु भएको भन्दै पीडित परिवारले विरोध जनाएका छन् ।