दुईजनाको समहुमा आएका थिए लुटेरा, संञ्चालकको विपीमा उपचार हुदै

इटहरी । इटहरी ९ स्थित बिराटनगर लाईनमा रहेको एक्टिभ मनि ट्रान्सफरका संञ्चालक सबिन दाहाललाई उपचारको लागी धरानस्थित विपी कोइराला स्वास्थ्य विज्ञान प्रतिष्ठान लगिएको छ ।

छुरा प्रहारले उनको कोखामा गहिरो चोट लागेको छ । प्रत्यक्षदर्शीका अनुसार दुईजनाको समुहमा आएका युवाले काउन्टरमा रहेका दाहाललाई छुरा देखाएर पैसा लुट्न खोजेका थिए । तर संञ्चालक दाहालले प्रतिकार गरेपछि लुटेराले छुरा हानेका थिए । छुरा प्रहार भएपछि दाहाल ढलेका थिए ।

सो क्रममा दुई बिच केही समय घम्साघम्सी भएको थियो ।

उनलाई छेउमै रहेको मेघा डेण्टलका डा. तृप्त नारायण यादवले अस्पताल पुराएका हुन । कति पैसा लुटियो भन्ने बिषयमा प्रहरीले अनुसन्धान गरिरहेको छ ।

लुटेराले प्रयोग गरेको छुरा ट्रान्सफर मै खसेको छ । पैसा लुटेर दौडिदै दुईजना भागेको प्रत्यक्षदर्शीले देखेका छन् । २० मिटरको दुरीमा रहेको प्रहरी बिटै अगाडी लुटपाट हुदा प्रहरी समेत समयमै नआएको भन्दै स्थानियहरु आक्रोशित बनेका थिए । इलाका प्रहरी कार्यालय इटहरीले घटनाको अनुसन्धान शुरु गरेको छ ।