सुदूरपश्चिमाञ्चल विश्वविद्यालयमा तोडफोड, प्राध्यापक र कर्मचारीका कुर्सी जलाइए

विश्वविद्यालयका प्राचार्य डा. भुपेन्द्र बिष्टविरुद्ध विद्यार्थी संगठन आन्दोलनमा उत्रिएका हुन। प्राचार्य विष्टले प्रक्रिया मिचेर आफुखुसी शिक्षक तथा कर्मचारी भर्ना गरेको भन्दै विश्वविद्यालयमा रहेका विद्यार्थी संगठनहरुले प्राध्यापक र कर्मचारीका कुर्सी जलाएका छन् । 

बुधवार यहाँका चार विद्यार्थी संगठनहरुले विश्वविद्यालयका प्राध्यापक र कर्मचारीका कुर्सी जलाएका हुन । साथै उनिहरुले विश्वविद्यालयमा तोडफोड पनि गरेका छन् । यसअघि आइतवार पनि विद्यार्थी संगठनहरुले प्राचार्य बिष्टको पुत्ला दहनका साथै कार्यालयमा तोडफोड गरेका थिए।

पूर्व एमाले निकट अनेरास्ववियु, पूर्व माओवादी केन्द्र अखिल क्रान्तिकारी, कांग्रेस निकट नेवि संघ र नेकपा विप्लव निकट विद्यार्थी संगठनले विश्वविद्यालयका नासु बिनोदराज जोशीको कुर्सी जलाएको हो।

प्रक्रियानै पुरा नगरी भर्ना गरिएका शिक्षक र कर्मचारीहरुलाई खारेज गर्नु पर्ने विद्यार्थी संगठनहरुको माग रहेको छ । तत्काल आफ्नो माग पुरा नभए आफुहरु जस्तो सुकै कडा कदम चाल्न बाध्य हुने नेपाल विद्यार्थी संगठनका नेता किशोर जोशीले बताए।

विश्वविद्यालयका प्राचार्य बिष्टले कुनै सुचना नै ननिकालेर आफुखुसीर राजनितिक भागबन्डाका आधारमा आफ्ना नातेदारहरुलाई भर्ना गरेको विद्यार्थी संगठनहरुको आरोप छ।

यद्यपी प्राचार्य बिष्टले भने भागबण्डाका आधारमा नभई आवश्यकताका आधारमा शिक्षक नियुक्त गरेको दाबी गर्छन् । अहिले विश्वविद्यालयमा राखिएका शिक्षकहरु पुर्णकालिन करार नभई ‘पार्ट टाईम’का लागि मात्रै राखिएकोले कुनै सूचना अर्थात प्रावधानमा जानु नपर्ने उनी बताउँछन् ।