नयाँ वर्षमै ३०० नयाँ विजुली बस चलाउने सरकारको योजना

सरकारले नयाँ विद्युतीय बस आगामी वैशाखबाटै चल्ने बताएको छ। संसदको विकास समितिको बैठकमा भौतिक पूर्वाधार तथा यातायात मन्त्री रघुवीर महासेठले आगामी बैशाख १ गतेदेखि काठमाडौं उपत्यकामा ३ सय विद्युतीय बस गुड्ने बताए।

मन्त्री महासेठले सरकारले आफ्नै विद्युतीय बस देशभर सञ्चालन लागिएको भन्दै त्यसको सुरुआत काठमाडौंबाट गर्न लागिएको बताए। मन्त्री महासेठकाअनुसार अहिले विद्युतीय बस सञ्चालन गर्न नेपालका सडकहरु कति उपयुक्त छ भनेर अध्ययन भइहरेको छ।

बैठकमा सांसदहरुले विद्युतीय बसको लागि चार्जिङ स्टेशन लगायतका पूर्वाधारबारे पनि प्रश्न उठाए। हाल बसहरुका लागि काठमाडौंमा चार्जिङ स्टेशनहरु बनेको छैन।

समिति सभापति कल्याणी खड्काले राजमार्गहरु मृत्युमार्ग बनेको भन्दै मन्त्री महासेठको ध्यानाकर्षण गराइन्। बैठकमा मन्त्री महासेठले सडक दुर्घटना कम गर्नेबारे अध्ययन गर्न सहसचिव सरोज प्रधानको नेतृत्वमा समिति बनाइएको बताए। उनले एक महिनापछि प्रतिवेदन आएपछि दुर्घटना कम गर्ने योजना लागू गर्न सरकार लाग्ने दावी गरे।

बैठकमा सांसद केदार सञ्जेलले जहाज मात्र नभएर बस पनि अब ‘वाइडबडी’ आवश्यक भएको धारणा राखे। बैठकमा सडकमा बढेको ट्रिपर र माइक्रोको आतंकबारे पनि सांसदहरुले प्रश्न उठाएका छन्।

यस्तै सांसद आशाकुमारी विकले ट्याक्सीको ठगी नियन्त्रण हुन नसकेको बताइन्। ‘बुटवलबाट काठमाडौं आउँदा ५ सय खर्च हुन्छ, त्यही कलंकीबाट बानेश्वर आउनुपर्दा ६ सय रुपैयाा तिनर्ने अवस्था किन हटेन ? उनले मन्त्रीलाई प्रश्न गरिन।