२२ रोपनी जग्गा दान अस्पताललाई

सोलुखुम्बु थुलुङ दूधकोसी गाउँपालिका केन्द्र मुक्लिमा बन्ने अस्पतालका लागि एक स्थानीयले २२ रोपनी जग्गा दान गरेका छन्।

गाउँपालिकाले निर्माण गर्न लागेको दूधकोसी सामुदायिक अस्पतालका लागि स्थानीय समाजसेवी गोरे राईले उक्त क्षेत्रफलको जमिन निःशुल्क दिएका हुन्।

उक्त जग्गामा सुविधासम्पन्न ५० शैयाको अस्पताल बनाउने अभियानमा एक जुट्ट भहि लागिएको गाउँपालिका अध्यक्ष असिम राईले जानकारी दिए।

अस्पताल निर्माणका लागि खर्च छुटाउन चैतमा श्रीमद् भागवत सप्ताहज्ञान बृहत् महायज्ञ आयोजना गरिने गाउँपालिकाले जनाएको छ। महायज्ञबाट २० करोड रुपैयाँ संकलन गर्ने लक्ष्य राखिएको छ।

कुनै पनि किसिमको दुर्घटना तथा बिरामी हुँदा महँगो शुल्क तिरेर हेलिकप्टर चार्टर गर्नुपर्ने हुदा जनताको बाध्यतालाई मध्यनजर गर्दै गाउँपालिकाले अस्पताल निर्माण गर्न लागिएको अध्यक्ष राईले बताए।

गाउँपालिका अध्यक्ष असिम राईले भने, ‘सोलुखुम्बुसहित आसपासका जनतालाई समेत उपचार सुविधा प्रदान गर्न भ्यान्टिलेटरसहितको अस्पताल निर्माण गर्नेछौं।’