फेक आइडी चलाउनेलाई सरकारले कडा कारबाही गर्ने

काठमाण्डु, ९ फागुन – सरकारले फेकबुक, ट्वीटर जस्ता सामाजिक सञ्जाल प्रयोगमा रोक लगाउन नखोजेको प्रष्ट पारेको छ । तर, समाजिक सञ्जालका प्रयोगकर्ताहरु मर्यादामा बस्नुपर्ने प्रवक्ता गोकुल बास्कोटाले बताए ।

मन्त्रिपरिषद्को निर्णयहरु सार्वजनिक गर्न बिहीबार आयोजित पत्रकार सम्मेलनमा सञ्चारमन्त्री गोकुल बास्कोटाले यस्तो बताएका हुन् ।

‘विचारलाई रोक्न खोजेको होइन । कसैलाई प्रतिबन्ध लगाएको पनि होइन । फेक आइडी बनाएर जथाभावी लेख्ने कुरालाई नियन्त्रण गर्न खोजेको हो,’ उनले भने, ‘जातिय सद्भाव, लैंगिक सद्भाव, राष्ट्रिय सार्वभौमिकतामा विध्वंश मच्चाउँदै हिँडेको छ भने त्यसलाई यत्तिकै छोडिदिने ?’

संसारको प्रयोग पनि हेर्न आग्रह गर्दै मन्त्री बास्कोटाले कुनै व्यक्तिले बोल्न नपाउने, लेख्न नपाउने अवस्था नआउने प्रष्ट पारे ।

‘सामाजिक सञ्जालको गलत प्रयोगलाई भारतमा पनि नियन्त्रण गरिएको छ । २४ घण्टाभित्र हटाउनुपर्छ । जर्मनीमा ६ करोडसम्म जरिवानाको व्यवस्था छ,’ उनले भने ।