नेपाल पत्रकार महासंघको आयोजनामा ६४ औँ स्थापना दिवसको अवसरमा रक्तदान

इटहरी - नेपाल पत्रकार महासंघ सुनसरीको ६४ औँ स्थापना दिवसको अवसरमा रक्तदान कार्यक्रम आयोजना गरिएको छ । इटहरीको रेयुकाई चौतारीमा रोटरी क्लव र टेवा बचत सहकारी संस्थाहरुको संयुक्त रुपमा रक्तदान कार्यक्रम आयोजना गरिएको हो ।

पूर्वका विभिन्न अस्पतालहरुमा रगतको तिव्र मागलाई ध्यानमा राखेर रक्तदान कार्यक्रम आयोजना गरिएको नेपाल पत्रकार महासंघ सुनसरीका अध्यक्ष अमर खड्काले बताउनुभयो । दैनिक ठुलो मात्रामा रगतको माग हुने गरेको अवस्थामा पत्रकार महासंघको ६४ औँ स्थापना दिवसका अवसरमा कार्यक्रम गरिएकोे जानकारी दिए ।

नेपाल पत्रकार महासंघले गर्न लागेको कार्यक्रममा इटहरीका दुई संस्थाहरुले पनि सहकार्य गरेका थिए । इटहरीको रोटरी क्बल र टेवा बचत तथा ऋण सहकारी संस्थाले पनि गर्ने बार्षिक रक्तदान कार्यक्रम नेपाल पत्रकार महासंघसँगै मिलेर संयुक्त रुपमा आयोजना गरिएको रोटरी क्लवका अध्यक्ष सन्दिप गौतमले जानकारी दिए ।

यस्तै कार्यक्रममा बोल्दै नेपाल रेडक्रस सुनसरीका सभापति उमेश थापाले इटहरी रक्तदाताहरुको शहर बन्दै गएको बताए । विपी कोईराला स्वास्थ्य विज्ञान प्रतिष्ठानमा आवश्यक पर्ने रगत मध्ये ३५ प्रतिशत रगत इटहरीका विभिन्न संघसंस्थाहरुबाट प्राप्त हुँदै आएको सभापति थापाले बताए । उनले खेर जाने रगतलाई जिवनदानका लागि दिन आम रक्तदाताहरुलाई आग्रह पनि गरे ।

रक्तदान कार्यक्रममा ७७ पिन्ट रगत संकलन भएको रक्तदान कार्यक्रमका संयोजक धु्रव ढकालले जानकारी दिए । रक्तदान कार्यक्रममा नेपाल रेडक्रस रक्तसंचार केन्द्र धरानका प्रविधिकहरुले सहयोग गरेका थिए ।