प्रदेश १ को संसद बैठक स्थगित

विराटनगर: बर्षातको पानी प्रदेश नं १ को सभाहल भित्र नै पसेर डुबान परेपछि संसदको बैठक १० दिनको लागि स्थगित गरिएको छ ।

आज बुधबार चौथो तथा बजेट अधिवेशनको २७ औं बैठक थियो । तर, बर्षातको पानी सभा हलभित्र पसेर डुबान भएपछि बैठक स्थगित गरिएको हो । बर्षातको पानी संसदको रोष्ट्रमसम्मै पुगेको थियो । प्रदेश सभामा पानी भरिन थालेपछि प्रदेशसभाका सचिव गोपालप्रसाद पराजुलीले एक सूचना जारी गर्दै बिशेष कारणवस बैठक स्थगित गरिएको जानकारी दिएका छन् 

सचिव पराजुलीले जारी गरेको सुचनामा आज स्थगित भएको बैठक साउन १९ गते १ बजे बस्ने पनि जानकारी दिएका छन् । लगातारको बर्षाले संसद्को बैठकस्थलमै पानी पसेको छ । यसअघि पनि संसद भवनभित्र पानी भरिएपछि मोटरले तानेर फाल्ने गरिएको थियो । संसद्को बैठक हल गहिरो भाग भएकोले बर्षात हुनुबित्तिकै पानी र ढलको फोहोरसमेत बैठक हलमा पुग्छ । बर्षातको समयमा विराटनगर डुबानमा पर्ने भएकोले राजधानी, प्रदेशसभा हल अन्यत्र सार्नुपर्ने माग प्रदेश सांसदहरुले नै उठाउदै आएका थिए । तर, सुनुवाई हुन सकेको छैन ।